Romans 12
1Konaga'nimogitapae, Goti'a ani kava'mo nehiya'mofe'mo nagaemo lapa maeno hau huno lapate'niya kavateti'e kavateti'efe'mo hu'nae'mo, Lapao ke hovanagi Gotike'mo lapakufamo alitapa amiyo. Ofali'niya ofalinimo auneme'e ofalinimo aote ofalinimo Goti'a amuse huno lapatesiya agufa ofalinimo alitapa amiyo. Ani agufa kava'mo lapakesafati'mo mono hisaya kava'mo hane'niye. 2Ma mopafi vayakana hutapa o'maigeno'ao Goti'a saufa lapaipa lapakesa'e vaya'mo alino hamaleno lapateno. Lapakaemo ani kavateti'mo Goti'a hiyo, huno nehiya kava'mo amalageka hutapa agegae. Agetetapae'mo, alagepa kava'mo Goti'a hau'niya kava'mogeno haino hapai'niya kava'mo hane'niye, hutapa agegae.3Nagaemo fiku naha maeno nami'niya himamu'aleti'mo muki vaya'mogitapae'mo lapa pai'nae'mo, Goti'a lapamete lapamete huno lapami'niya yafe'mo hutapae'mo, nagesa afi'na fatago hu'nova ya'mo na magi ya'amo alino nami'nifi, hutapa lapamete lapamete hutapa lapakesa afita ho hutetapa yagaita ateyo. Fiku yanageno mago aise'amo ali'nisiya vekamo'a, alopa ya'mo ali'nove, huno agesa afigiye. 4Lagufafi'mo asole alu ya alu yatimo hane'niya'monanafa magoke agufa ali'ya'mo no'alifa alu ali'ya alu ali'ya'mo ne'aliye. 5Ani kava huta asole vaya'mo mai'netae'mo Kalaisi'a magoke vekamo agufafi'mo mai'none. Lamete lamete huta mai'nona'monanafa magoke vekamo agufafi'mo alu ya alu ya'amo mai'nona'mofe'mo afalu afalugana huta mai'none.
6Goti'a aeto agufa aeto agufa ali'ya'amo alisunafe'mo alu ya alu ya'amo fiku laha maeno lami'niye. Agaetegati'mo ge'amo ali'nitetapa aeta hakalo hutapa hapa paisayafe'mo lapami'nisiyana ani kava hutapa apakesa afi'a fatago hisaya agufa gemo aeta hakalo hutapa hapa paiyo. 7Hapa maetapa ali'ya'mo alisayafe'mo lapami'nisiyana ani kava hutapa hapa maetapa ali'ya'mo aliyo. Alitapa apaya malesayafe'mo lapami'nisiyana ani kava hutapa alita apaya maleyo. 8Alitapa he titapa apatesage'apae'mo akame hisayafe'mo lapami'nisiyana ani kava hutapa Goti ge'amo hapa paitetapa alita he titapa apateyo. Fiku hapa maeta apamisayafe'mo lapami'nisiyana ani kava hutapa alagepa huta lapakesa afi'netapaeke'mo fiku hapa maeta apamiyo. Yagaitapa apatesayafe'mo lapami'nisiyana ani kava hutapa lapayamukiki hutapa yagaitapa apateyo. Lapau hutapa apatesayafe'mo lapami'nisiyana lapamogaga ai'netapa lapau hutapa apateyo.
9Aigofe olapauno lapaipafati'mo lapau lapayamopafi'mo lapaino. Hosu kavafe'mo alagi olapau'ninagetapa alagepa kavate'mo atafautapa alagi hutapa maiyo. 10Magoke konagamogimo nehaya kava hutapa yuna lapaipa kali'netapa lapau lapayamopafi'mo lapaino. Apakava o'maitapa hogotetapa apaki'apile'mo alita asaga hutapa apateyo. 11Alaga olapaenagetapa lapayamukiki hutapa Ala kava ne'mo ali'ya'amo aliyo. 12Afole aisiya kavafe'mo agava mai'netapae'mo lapavayagunagu hutapa lapamogaga aiyo. Hanageke ya'mo ne'alitapae'mo o'ataleta atafautapa alagi hutapa maiyo. O'ataleta nunumu huge huge hutapa maiyo. 13Kagemi yatapimo alita fako hutapa apaote vaya'mo kagemi ya'apimo ohane'nisiya vaya'mo apamiyo. Nata vaya'mo esagetapae'mo alagepa huta yagaitapa apateyo. 14Apaini hu'a nelapatesaya vaya'aife'mo, Goti'a lapa maeno, hutapa hiyo. Gotife'mo, hosu kava'mo hu'a maiyo, hutapa osuta alagepa kava'mo hu'a maiyo, hutapa nunumu hutapa apateyo. 15Apamogaga aisaya vaya'e'mo magokepi lapamogaga aiyo. Inagi avi'ya hisaya vaya'e'mo ani kava hutapa magokepi avi'ya hiyo. 16Magoke lapaipa lapakesa alitapa maiyo. Ala lapaki alisaya agufa kava'mo osutapa ina agufa vaya'mo mai'nae, hu'a hisaya agufa kavake'mo hutapa maiyo. Alagi ago afiteta age'nona vaya'mo mai'none, hutapa lapakesa o'afitapa afa'a maiyo. 17Lapakaetegamo hosu kava'mo nehisagetapae'mo anona'apile'mo hosu kava'mo aeta atagaina hutapa osutapa afa'a maiyo. Muki vaya'mogimo lapakete'apae'mo, alagepa kava'mo nehae, hu'a hisaya agufa kavake'mo hiyo. 18Muki vaya'e'mo magokepi kanale hutapa lokaeta maisaya ka'mo hane'nisiya'mo'mo lapakaemo afa'a hisaya kava'mo hutapa magokepi lokaeta maiyo. 19Nahau nayamopafi'mo nahau'niya vaya'nimogitapae, hu'na, hosu kava'mo anona'apilefe'mo hosu kava'mo aetapa atagaina huta osutapa Goti'a apamisiyafe'mo maitapa halove huta ategeno'ao. Ani kavatefe'mo Goti ge'amo'mo huno'ae'mo,Ala kava ne'mo'a, Hosu kava'mo anona'apilefe'mo apamisuva ali'ya'nimo nagai'ni ali'ya'mo hane'niye. Anona'apilefe'mo ae'na atagaina hu'na apamiguve, huno hu male'niye, huno hu'niye. 20Mago'e gemo huno'ae'mo,
kame vayatapimo apaka netesigetapae'mo ne'ya'mo alita apamiyo. Anife'mo nehapaisigetapae'mo ani'mo hefitapa apamiyo. Mani kava'mo nehutapae'mo ata hokanufamo hutapa alita apakenopale'mo malesageno apakafu kigiye,
huno hu'niye. 21Fiku yanageno hosu kava'apimo'a aeno lapakasegaiyanagi alagepa kavatapileti'mo hosu kava'apimo aetapa agaseyo.
Copyright information for
KYG